20 نوفمبر 2010

جرافاتار أيقونة خاصة بك لتظهر في تعليقاتك على المدونات ( درس )

بسم الله الرحمن الرحيم
السلام عليكم و رحمة الله تعالى و بركاته

أولاً لو ناظرتوا على اليمين أنا حاط تصويت عشان درس
أتمنى أن الكل يساهم بالتصويت على أي درس تبوني أشرحه

ثانياً نبتدي بدرسنا اليوم و هو شرح طريقة عمل حساب في جرافاتار
و هالموقع خدمته بسيطة أنه يربط ايميلك بصورة خاصة بك
و لما تيجي ترد في مواقع او مدونات او مواقع اخبارية
فبدل لا يطلع لك الصورة ( فاضية ) بلانك مثل هذي ....
يقوم يطلع لك صورة من اختيارك انت تسويها في الحساب
و طبعا مو كل المواقع او المدونات تدعهم هالشي
لكن اجزم ان 85% من مواقع الانترنت و المدونات تدعم هالشي
و اعتقد حتى اكثر المدونين مو مسويين هالشي في حساباتهم يعنى تلقى جم مدون معروفين
باسمائهم  مدوناتهم يردون على المدونات الصديقة و يطلع لهم نفس هالصورة اللي فوق ( بلانك ) فاضية
ليش ما نخليها تطلع صورة خاصة لنا في تعليقاتنا ؟
موقع جرافاتار ببساطة يسوي لنا هالشي و اليوم راح نعلمكم شلون نفتح حساب فيه
و نحط الصورة و تصير ردودنا لها صورة حلوة احسن من هالصورة الناشفة اللي فوق :)
اشرايكم نبتدي على بركة الله ؟

اول شي نروح موقع جرافاتار على العنوان التالي

في صفحة البداية و كما هو واضح بالصورة نضغط على مسمى Login / Sign Up
نتسدل قائمة نختار منها Sign Up
هكذا تماما .....

راح تفتح معنا صفحة التسجيل و كما هو ظاهر في الصورة التالية
نضع عنوان بريدنا الالكتروني
( ملاحظة: تم اخفاء جميع معلوماتي الشخصية في الدرس بما فيها عنوان البريد المستخدم لاسباب تتعلق بالخصوصية )
1- تكتبوا عنوان ايميلكم
2- تضغطوا Sign up
الصورة تتكلم ..............

بعد ما ضغطتوا ساين أب تجينا هالصفحة اضغطوا على الزر اللي مأشر لكم عليه بالسهم ...
الحين تروحون بريدكم بعد ما ضغطتوا على الزر و تجيكم الرسالة بهالشكل
و لو ما حصلتوها بالإنبوكس Inbox تحصلونها في الجانك ميل فولدر ....

افتحوا الرسالة و راح يكون محتواها كما في الصورة التالية
اضغطوا على الرابط المشار اليه بالسهم ...


اضغطوا على الرابط اللي ظهر لكم بالايميل عشان تفعلوا الحساب
و راح تفتح لكم هالصفحة املأوا البيانات المطلوبة منكم و هي بسيطة جداً كما في الصورة التالية
1- اليوزر نيم ( اسم المستخدم ) حتى تسجلوا دخولكم للجرافاتار في حال حبيتوا تعدلوا الصورة او تضيفوا عناوين ثانية
2- تكتبوا الباسوورد ( كلمة السر )
3- تكرروا كتابة كلمة السر
4- اضغطوا Signup
و الصورة توضح لكم

 
الحين بعد ما خلصتوا و ضغطتوا ساين أب بتجيكم الصفحة الرئيسية تبارك لكم التسجيل
في هالصفحة إضغطوا على Add one by clicking here! حتى نضيف صورة لايميلنا
اضغطوا عليها كما في الصورة ....
 و الحين بتيجيكم هالصفحة اللي هي من وين نبي نحط الصورة ؟
عادة نكون حاطينها بالكمبيوتر اكيد :) نختار الاختيار الاول اللي هو My Computer's hard drive
مثل اللي بالصورة ...
بعدها تجينا هالصفحة اللي هي البراوز عشان نختار الصورة من جهازنا
طبقوا كما في الصورة التالية
1- اضغطوا Browse بعدها اختاروا الصورة من جهازكم اللي تبونها تكون ايقونتكم في تعليقات المدونات
2- اضغطوا نيكست
و الصورة توضح لكم هالخطوة ...

تمام لهني ؟؟؟
راح تظهر لكم الصفحة اللي بعدها الصورة اللي اخترناها
اضغطوا على زر Crop and finish
عشان نختارها و ننتقل للخطوة الاخيرة .... الصورة توضح لكم
بعد ما ضغطنا كروب أند فينيش
تجينا صفحة يسألونا عن تقييم الصورة
يعني هل هي صالحة للعرض لجميع المواقع ام مواقع باشراف الوالدين ام للبالغين
ما لنا بهالطوشة لان كل واحد يختار صورته بضميره و لحسن النية سنختار الاختيار الاول
اللي هو G صالحة للنشر و المشاهدة من قبل جميع الاعمار و لا تخالف قوانين الآداب
عشان جذي نضغط على الحرف G كما هو واضح بالصورة التالية
بعد ما سوينا التقييم للصورة و ضغطنا الحرف G
راح يردنا المتصفح للصفحة الاولى للجرافاتار و يبارك لنا المهمة و راح نشوف الصورة جت جذي بالصفحة
تماااااااام للحين :)
اشرايكم نجرب نرد على اي مدونة و نحط تعليقنا عليها ؟
أنا اليوم الصباح لفت انتباهي موضوع بوست مميز للأخ : (( هورنت )) في مدونته
و يتحدث عن وجود راوتر خاص لمستخدمي الآيفون فقمت بالدخول و الثناء على المقال الرائع
و باستخدام معلوماتي الجديدة للجرافاتار
و اللي هي في التعليق
1- احط اسمي
2- احط ايميلي اللي سجلته في موقع جرافاتار
3- و عنوان موقعي هذا كمبيوترجي ( غير ضروري اللي ما عنده موقع )
ثم كتبنا التعليق
كما في الصورة
و هنا يظهر تعليقي بانتظار اشراف صاحب المدونة للموافقة عليه ....
نلاحظ تماما ان الصورة اللي اخترتها للجرافاتار ظهرت :) كما هو مشار اليها بالسهم في الصورة السابقة
و الحين في اي موقع ادخل هالمعلومات على طول تطلع صورة ايقونتي
افضل و تعطيك شخصية لنفسك و ترمز لك مو دايم تطلع فاضية و ناشفة لا نكهة و لا لون زي هذي


ملاحظات هامة :
أعزائي المدونين عنواني للرد على المدونات و تعليقاتي بها ثابت لا يتغير و هو ليس العنوان نفسه الذي يظهر في صفحة الاتصال بي

شكراً للأخ هورنت و مدونته الكريمة فهي تم ذكرها بالمثال المشروح في الدرس
لزيارة مدونة الأخ (( هـورنت ))
التوجه إلى العنوان التالي: www.waw.cc

أتمنى لكم التوفيق و أحسنوا اختيار ايقوناتكم فهي تعبر عن شخصيتكم
تقبلوا اعطر التحايا
كمبيوترجي

10 تعليقات:

ناعمة الهمس يقول...

شكرا اخوي
بس هذي الخدمة متوفرة في مدونات جوجل
و لكي حرية الاختيار اذا تبي تكون صور اصحاب الردود
موجودة او لا
انا بصراحة حذفت هذي الخاصية
لان كانت الصور تداخل مع التعليق
فما اقدر اقرا التعليق عدل
فعشان جذي خليته مجرد ايقونة صغيرة فقط

بس اعتقد هالخدمة تفيد الزوار اللي ما عندهم مدونات
ويكون ردهم مجهول
شكرا ع البوست

كمبيوترجي يقول...

هلا اختي ناعمة الهمس
بالعكس اختي الخاصية ممتازة سواء للمدون و غيرهم و خطأ اللخبطة اللي بتصير في التعليق لا تتعلق بايقونتك ابدا بل تتعلق بالكود البرمجي لصفحة المدون او الموقع و لا علاقة لها بالحساب

الخاصية مفعلة باغلب المدونات و اخص منها الوورد بريس اكثر من الجوجل

اما بالنسبة لمستخدمي جووجل المشاركين فهي افضل حالا ربما في بعض الاحيان و ان شاء الله ابي اسوي تدوينة عن فتح حساب في جووجل يستفيد منها الزوار لعمل حسابات و طريقة متابعة المدونات و التعليق فيها هالشي مفيد جدا بصراحة و يريح الواحد من عناء كتابة معلومات الدخول كل مرة و يكتفي باليميل فقط

شكرا لمررورك العطر ناعمة الهمس و لاضافتك القيمة
تحياتي

Kuwait10 يقول...

شكرا على هذا الموضوع الجميل يا جميل، والسؤال اللي يطرح نفسه: لماذا لا تظهر Avatar الخاصة بي عندما أعلق في مدونتك مع إن لدي حساب في Gravatar؟
الرابط:
http://bit.ly/9d5FIM

مرام يقول...

الموقع حلو و أنا استخدم

مشكور علي الموضوع الله يعطيك العافيه

كمبيوترجي يقول...

هلا و غلا بالاخ الغالي كويت10
أشكرك جدا على الكلام الحلو و الطيب يا طيب :)

بالنسبة لسؤالك
أنا استغربت الامر بالفعل !!!
بان هناك بعض المعلقين الذين ارى صورة افاتارهم على تعليقات الكثير من المدونات
و قلت في نفسي
ربما مدونات بلوغرز لا تدعم خاصية اظهار الجرافاتار !!
و الامر الاخر هو ربما كان النموذج الخاص بستايل مدوتي فيه خطأ برمجي او كود غير موجود يسمح باظهار صورة الافتار
و هالشي ان شاء الله سأقوم باصلاحه في القريب العاجل و دامك خبرتني اكيد راح يكون هالموضوع من الاولويات و سأرى ما هي المشكلة بإذن الله :)

شاكر لك جدا على التنبيه
و لك مني افضل التحياااات
كمبيوترجي

كمبيوترجي يقول...

هلا و غلا بالاخت الغالية مرام
شكرا على مرورك و اتمنى لك كل التوفيق يالغالية
و الحين توكد ان عندي غلط على حسب ردي للاخ كويت 10
و انتي مع البلوغرز الظاهر فعلا الخطأ في كود النموذج الخاص بالمدونة
شكرا لك
و تحياتي و احترامي

Kuwait10 يقول...

أعتقد إن المسألة متعلقة بـ Bloggers بالدرجة الأولى.

Mubarak Esmail يقول...

يعطيك العافية على الدرس
مبين متعوب عليه
نبي درس جيل بريك بعد ماعليك امر :)

كمبيوترجي يقول...

هلا و غلا بالأخ العزيز مبارك
منور المدونة بحضورك يالغالي
و تشكر على الكلمات الطيبة

بالنسبة للجيل بريك
اعتقد الامر مرتبط بـ ( آبل و ماك )
يرجى العلم انني لا ادعم لا آبل و لا ماك لا من قريب و لا من بعيد :)

و نصيحتي هي أن تزور ملك الآبل
الأخ العزيز ( أبوفلان )
و صدقني وياه ما يخيب ظنك أبد تراه للنخاع مع الآبل و شعار موقعه بكوب القهوة آبل يصبح و يمسي آبل و لا شي سوى الآبل و لو انا قررت بيوم من الايام التوجه لابل ما عاذ الله يعني ... فلا ملجأ لي بعد الله سوى ابو فلان :)
www.Aboflan.com

و شكرا مرة اخرى على حضورك الطيب
احترامي لك
كمبيوترجي

Mubarak Esmail يقول...

لوول اوكي تسلم يالغالي ماتقصر :)

إرسال تعليق