بسم الله الرحمن الرحيم
السلام عليكم و رحمة الله و بركاته
تحية طيبة و بعد ...
لووول مفكر عمري قاعد أكتب رسالة حق أمي :) ما علينا بالطويلة
تلاحظون معاي أشياء كثير على النت و رموز و كودات تحسبها لبرهة من الزمن
وده يقول برهة من الزمن باطة جبده هالكلمة و مسوي هالمقال عشانها
المهم
هذي الحلقة الثانية من سلسلة فنتكة كمبيوترية
و راح نتكلم فيها عن مصطلحات نشوفها على النت
المهم
أشياء حلوة و أشياء مو حلوة على النت
و أشياء تخليك تتسائل
يعني أنا أول مرة دشيت النت سنة 1996 كنت ولد يومها
ترى من مقهى انترنت و كانت الساعة ذاك الوقت بالكويت ابخمس دنانير
و جان أشوف البلاوي على النت و تعرفون اللقافة شلون تصير أول أيام النت
ما علينا
المهم كنت أشوف رموز و كودات و كلمات معقدة و كنت أقول أخ مالت على حظي لو أني أعرف ايش هي هالكلمة عشان اقعد اسوي عمري فاهم قدام الربع و اصير الكع فيها او على الاقل افهم ايش اللي جاب ام هالكلمة هني ؟
مثال
http و www و IP و MSN و و و و و
ترى القائمة طويلة و عويصة ما تخلص و كل يوم يضيفون مصطلحات جديدة لمنظمة الكلمات الجديدة في الولايات المتحدة و من شهرين اضافوا كلمة تويتر
الحين في حلقتي هذي ما أبي أكون ثقيل و أترس شوال بو خيش مصطلحات لكن يمدينا عليهم حبة حبة و نعرفهم انشالله مع الوقت و نرجع لهم في اي وقت عشان لو واجهنا مصطلح تعرفون شلون تشرحونه و تفهمون حق شنو اهو بالضبط و تعرفوا متى تستخدمونها
عشان جذي هالحلقة راح اذكر لكم فقط 5 مصطلحات و الحلقة الياية ان شاء الله 5 و هكذا دواليكم الى ما شاء الله
طبعاً عشان نكون واضحين بالشرح تحت للمصطلحات الخمسة لهذي الحلقة
انا راح اكتب اختصار المصطلح بالانجليزي ثم اكتبه كتابة كاملة بالانجليزي
ثم اشرح لكم عنه بالعربي
و راح تلاحظون اكتب الاختصار باحرف كبيرة و معناه بالانجليزي باحرف صغيرة لكن مع جعل الحرف اللي مرتبط بالمصطلح فقط هو الكبير
و بعضهم يكون كلمة واحدة ما يبيلها تقسيمات احرف للمصطلح
على بركة الله نبدأ
WWW
World Wide Web
شبكة المعلومات العالمية أو الشبكة العنكبوتية العالمية
هذي الله يسلمكم مافي احد ما شافها و تصدقوا حتى الناس للحين بعض من يجهلها و يبي يقولك خذ خذ ايميلي اكتب اكتب اكتب بس اكتب دبليو دبليو دبليو دبليو دبليو و هم بعد دبليو فلان الفلاني دوت كوم و جذي يجيكم عوار راس ما لامه تالي و لا تعرفون للحين اهو على الياهو ولا على الهوت الميل و لا الجي ميل ؟
امحق تلقاه بس وده يقول الدبليو دبليو دبليو عشان يسوي عمره فاهم ايش الموضوع و لا اهو مايدري ان كانت دبليو على فوق و لا تحت ههههههه
المهم اللي ابي اوصله لكم هذا الحرف خطير صج يطلع الولد من بطن امه يقول دبليو دبليو دبليو
يعني ماكو احد ما شاف هذا الحرف اللزقة
و يستخدم عادة قبل كل عنوان انترنت
مثال عليها مدونتي
عرفتوا الحين الدبليو وين تكون ؟
كل المواقع جذي
و نقدر نستغني عن الدبليو ما يتأثر العنوان
لكن بشرط تشيلون النقطة اللي بعد الدبليو دبليو دبليو
و راح نعرف شلون نستغني عن الدبليو لو مرة بالعمر من المصطلح التالي
HTTP
HyperText Transfer Protocol
نلفظها جذي : هايبر تيكست ترانسفير بروتوكول
إتش تي تي بي
هذا يا طويلين العمر جنسية
اي نعم جنسية
انا اقول لكم شلون جنسية
هذي جنسية الإنترنت و هي اللي تخليك تعرف ان اللي قاعد تتعامل معاه موقع انترنت و شرحه صعب بعض الشيء لكن بجيبها لكم باسلوب مبسط اسهل من شرب الماي
يسمونها منصة ما ابي اقول لكم بروتوكول لان لها سالفة ثانية نعرفكم عليها بعدين لذلك خلنا نقول منصة انطلاق للمواقع كلها على الانترنت
يعني لو ايش تسوي لو تقط سيارتك بنهر الامازون ما تقدر ابداً تدش موقع الا تلقى هال HTTP منثبر بأول كل عنوان
تقدر تستغني عن الدبليو دبليو دبليو اللي قلناها لكم فوق مالت اللي يسوون عمرهم فاهمينها عدل
تقدر تقط لابتوبك من الدريشة و تكسره لكن هذي ما تقدر تشيلها من قدام اي موقع
لانها جنسيته و هي اللي تخبرك انه هذا موقع انترنت مو كيلو خيار
حاولوا تجربونها و راح تعرفوا المقصد
و حتى نعرفكم بمعنى المصطلح بشكل رسمي فهو
برتوكول نقل النصوص المترابطة
الحين اي واحدة اسهل اللي شرحتها و لا اللي من شوي قلتها بخصوص مترابطة ؟
الحين صار عندكم فكرة واضحة جداً و ان اي موقع من المستحيل ان لا يحتوي على بروتوكول او منصة خاصة و الاتش تي تي بي هي منصة مواقع الانترنت بشكل عام
COOKIES
مثل ما شفتوها و تقروها كوكيز و الكوكيز ترجمتها الفعلية تعني حلوة قطعة حلوة او كيكة
أبي اشرحها لكم و ليش المواقع تستخدم هالحركة اللي نسمعها كثير كوكيز و تلقى ناس يقولون لك فعل الكوكيز او وقف الكوكيز بالمتصفح
اوكي خلكم معاي خطوة خطوة و راح تعرفون ايش هي فايدة و مضار الكوكيز بالمتصفح
خلني اعطيكم مثال بسيط
انا الحين رحت ازور موقع على الانترنت حق كمبيوترات و جذي
هذا الموقع انا ظهر لي فيه صفحته من فوق اعلان زين للحين ؟
هذا الاعلان لو انا دشيت مرة ثانية على الموقع القاه تغير مرة ثانية لاعلان غير اللي انا شفته
ايش السبب مو نفس الاعلان ؟
السبب هو الكوكيز
تعالوا ابسطها بعد بطريقة اسهل ما يكون على الاستيعاب
لنفرض صادفتوا بياع بمدرج ملعب يبيع حلو كوكيز زين
هذا البياع عطاك كوكي عشان تجربها و يسوي دعاية حق نفسه و يقوم يقنعك تشتري منه علبة عصير
والله و اشتريت العصير و بنفس الوقت هو اعطاك كوكيز حلويات عشان دعاية حق عصيره اللي باعك اياه
قام الرجال الله يهداه صادفناه عن البوابة و قام يلزق فيك يقولك بليز و ما بليز اشتري مني العصير هذا
انت تجي تقوله يبا انا من خمس دقايق شاري منك علبة عصير اهو راح يقولك صدقني ما اذكر بعتك شي
و اول مرة اشوفك شلون تبيني اصدق اني بعتك علبة عصير من عندي ؟
انت هني على طول طلع له الكوكيز مالته اللي اعطاك اياه و انت بالمدرج و راح يتذكرك على طول
ساعتها البياع يقولك اي الحين تذكرتك انت اللي بالمدرج بالصف الاول و قعدت اضحك وياك و عطيتك هالكوكيز الحين تذكرتك
يا ترى هل وضحت الفكرة لكم بخصوص الكوكيز مع مواقع الانترنت ؟
هذا اللي يصير
الموقع يقوم يعطيك كوكيز عبارة عن ملف نصي صغير يخزنه بفولدر الكوكيز مال الانترنت اكسبلورر عندكم
و كل ما انت زرت الموقع تلقى هالموقع يعرفك و يتعرف عليك من خلال الكوكيز
لانه يكتب عليها بيانات قدومك للموقع مثل عنوان الاي بي و من اي دولة و اي ساعة دخلت لهم و اي يوم و بعض المعلومات الشخصية المسجلة مسبقاً على اعدادت الاكسبلورر
هالشي يخلي الموقع يتعرف عليك لما ترجع له
و هذي الخاصية نافعة في حالة المنتديات مو كل مرة تضطر تدخل اليوزر نيم و الباسوورد على الموقع عشان تدش و تشوف المواضيع و ترد
الكوكيز خلاص يحفظ هذي المعلومات على جهازك و على طول من تدش للمنتدى تلقى نفسك داخل اون لاين و ماش الله عليك ترد و تكتب مواضيع بدون ما تدخل معلوماتك كل مرة
هذي نعمته
اما مضاره تعتبره بعض الهيئات العالمية انتهاك خصوصية
ولكن للعلم منافعه تعتبر اكبر من مضاره بالمقارنة مع الجهد و الحوسة اللي ممكن تصير مع المستخدم لما يزور موقع ما يعرفه
DOWNLOAD
الكل يعرفها و يلفظها و يقول داونلود
و الاغلبية يقول لها تحميل
حمل هذا الفلم حمل هذا البرنامج حمل هذا المقطع حمل هذا و حمل ذا و حمل هذي و حمل ذي
حمل حمل حمل حمل
ستووووووووووووووووووووووووووووووووووووووووووب
الحين تقولون دام الكل يعرفها ليش تشرحها ؟
انا بقولكم ليش
لانكم تقولون لها حمل
او تحميل
و الحقيقة المرة اللي اكتشفتها منذ مبطي ان الكلمة مو معناه تحميل بصراحة
تعالوا نشرحها و نفهمها عشان دايما نقول الكلمة صح
الكلمة قسمين تلاحظونها ؟
داون Down يعني تحت
لود Load التحميل
لو جمعناهم صارت الكلمة تعني انزال
تنزيل
يعني نصير نقول نزل هذي و نزل ذي نزل هذا و نزل ذا
عرفتوا الحين السر الخطير اللي اهالينا مخبينه علينا منذ نعومة اظافرنا ؟
ما توقعون اشكبر هالخيانة اللغوية اللي خبوها علينا المواقع و اهلنا و اساتذتنا بالمدارس و المعاهد و حتى جارتنا ام حمود ما قالت لي ان معناها تنزيل مو تحميل
تعالوا نفهمها اكثر
لو قلنا داون Down يعني تحت يعني نزوووول يعني انزل
مثال Go Down انزل تحت
طيب Download it نزلها
اما لو قلتوا حملها
اويلي ويلاااه
يعني عكسها بالضبط تحميل تعني ارفع حملها
يعني مثال لو العامل الهندي اللي مقابل شركة الخرافي قالوا له حمل الكرتون على الهالفلوري حملها الحين
يقوم العامل المسكين يرفعها على كتفه و يحملها بالهالفلوري
هل اهو نزلها و لا رفعها ؟
رفعها صح
طيب دام رفعها هذا معناه انه سوى للكرتونة Upload يعني فوق رفعها
اما لو قلنا للعامل Download it تلقاه نزلها و هذا معناه ان الداون لود تنزيل و كلمة تحميل تعني آب لود اي رفع
هذي عكس ذي يا اخواني
الحين تبوني اشرح لكم اب لود ؟؟؟؟
UPLOAD
حلو بكلمتين من الآخر
شفتوا اشكثر انبط جبدي و انا اشرح معنى داون لود ؟
يا سلام عليكم
اب لود هي العكس تماما :)
عصفورين بحجر
الحين المصطلح الخامس و الاخير لهذه الحلقة
HOME PAGE
ماكو موقع على الانترنت الا و عنده هوم بيج
الهوم بيج كلمتين
هوم و تعني بيت او منزل
و بيج تعني صفحة
و المصطلح يقولك هني انه الهوم بيج الصفحة الرئيسية او صحة البدء او صفحة المنزل الاولى
و هذي الكلمة لو تضغطونها من اي موقع توديكم لاول صفحة رئيسية بالموقع و هي عادة اللي يستقبلون الزوار فيها
سهلة و خفيفة و لذيذة
بهذي التحية الطيبة انهي حلقة اليوم من سلسلة فنتكة كمبيوترية
و المحتوى كان من صالح مصطلحات الويب على الانترنت لهذي الحلقة
مع حلقة جديدة نستودعكم الله الى الآن على أمل اللقاء بكم من جديد
و لاي استفسارات حاضرين للطيبين
كمبيوترجي
