سلسلة فنتكة كمبيوترية: اختصارات على الدسك توب عملية جداً تعالوا نتعلم نسويها ...

بسم الله الرحمن الرحيم

السلام عليكم و رحمة الله تعالى و بركاته

أرحب بكم جميعاً أخواني الأعزاء في الحلقة الثالثة من سلسلة ( فنتكة كمبيوترية )

و ستكون من نصيب كيفية التعامل مع نظام التشغيل ويندوز إكس بي Windows XP

و نبي نتعلم اليوم شلون نسوي اختصار على الدسك توب " سطح المكتب "

طبعاً هالعملية سهلة لأي واحد فينا بكل بساطة اي واحد يقدر يسوي اختصار لاي ملف

او مجلد او صورة او اي شي على الجهاز بالضغط على الايقونة الخاصة للملف

و نختار ارسال الى سطح المكتب كاختصار على سطح المكتب ...

لكن هذا مو مقصدي ابداً :)

نقصد اننا نسوي اختصار عملي ينفعنا في النظام و يختصر وقت او متاهة معينة

و اليوم راح اعلمكم شلون نسوي اختصار حق 3 أزرار للويندوز اكس بي

اللي هم:

إيقاف التشغيل : Shutdown

إعادة التشغيل : Restart

تسجيل الخروج : Logoff

و نضبطهم على شكل أيقونات على الدسك توب و نخلي لهم نفس شكلهم الاساسي اللي نشوفه بـ الستارت مينيو

على بركة الله نبدأ

حتى نسوي إختصار إيقاف التشغيل SHUTDOWN نتبع الخطوات التالية :

تروحون مكان فاضي بالدسك توب و تضغطوا كليك يمين Right Click

تختارون " إختصار جديد " من القائمة اللي طلعت لكم بعد ما ضغطتوا رايت كليك New Shortcut

الحين تفتح لكم نافذة جديدة و تلقون مؤشر الكتابة موجود في الفراغ الوحيد اللي في النافذة

مكان هذا الفراغ اكتبوا هذي الجملة: shutdown.exe -s -t 0

بعدها نضغط التالي Next

تلقون الفراغ عشان تسمية الاختصار او الايقونة سمونها لمستخدمي العربي إيقاف التشغيل أو اللي تحبونه

المهم يكون شي يعرفكم ان هذي الايقون اهي اللي تطفي الجهاز

بعدين تضغطون إنهاء أو Finish

راح تلقون الايقونة صارت جذي بالضبط

الحين أكيد تقولون شكل اليقونة جذي " خرطي " لا لون لا طعم لا شي يدل على وظيفتها الا اسمها بس !!!

كملوا معاي و هم نضبطكم :)

تعالوا الحين نغير شكل الايقونة

رايت كليك على الأيقونة كليك يمين

نختار اخر اختيار من القائمة اللي هي الخصائص Properties

تطلع لكم نافذة افتراضياً يكون القسم اللي في النافذة هو Shortcut او الاختصار اسم القسم

فيه ثلاث ازرار تحت تقريبا بعد منتصف النافذة

اختاروا الزر تغيير الأيقونة Change Icon

تطلع لكم هذي النافذة

اختاروا الايقونة اللي انا مظللها تحت على اليمين

بعدها تضغطون اوكي موافق و هم بعد موافق :)

الايقونة راح تصير جذي :)

شحلاتها منثبرة على الدسك توب و لا يبيلنا نروح إبدأ ابداً و لا ستارت و لا ايقاف تشغيل و لا بطيخ

على طول دبل كليك و الجهاز يسوي ايقاف تشغيل بدون هالحوسة :)

جذي نكون اختصرنا وقت حتى لو كان بسيط لكن اختيار سريع لان احياناً قائمة ابدأ تعلق ويانا

خلونا نسوي الريستار اللي اهي اعادة التشغيل Restart

طبقوا معاي الخطوات كلها اللي قلناها عن ايقاف التشغيل لغاية الكود اللي نبي نحطه بالفراغ

اكتبوا هذا الكود بالفراغ

shutdown.exe -r -t 0

لاحظوا الفرق بينها و بين الاولى حرف واحد و هو حرف R بدل حرف S

الحين كملوا لغاية تغيير الايقونة

راح اترك لكم التصرف من هذي الناحية و اكيد راح تعرفون اي ايقونة تختاروا حق الريستارت :)

يلا ورونا همتكم

الحين نجي للاختصار الاخير و هو تسجيل الخروج من المستخدم Logoff

يعني يرجعك لشاشة ترحيب ويندوز مكان ما تدخلون الباسوورد عشان تدشوا لليوزر مالكم

و الكود الخاص بتسجيل الخروج للاختصار هو

shutdown.exe -I -t 0

هاااا

اشوفكم بدعتوا :)

ما يبالي اشرح الباقي بخصوص شلون تختاروا ايقونة و جذي

انا مشيت وياكم بالتدريج

الاولى شرحت شرح كامل و الثانية خبرتكم لغاية الكود

و الثالثة خبرتكم الكود و بس

و تركت الباقي عليكم

لو ضبطت اموركم

هذا دليل انكم تعلمتم الدرس بكل سهولة و صار عندكم مثل شرب كوب الماي

زين الحين اقولكم يعله صحة و عافية عليكم

و نلتقي وياكم في حلقة جديدة ان شاء الله من سلسلة فنتكة كمبيوترية

و اللي عنده اي استفسار حيااااااااااااااااااكم شباااااااااااااااااب

كمبيوترجي